两部内地剧集《如懿传》同《延禧攻略》寻晚正式打对台，中港台成千上万嘅剧迷真系好唔得闲，煲完一部又一部之馀，仲要做埋花生友，批评吓首播嘅《如》剧，当然有弹有赞，平分春色！
当中最大花生亮点，就系话《如》嘅服装同布景等等，同《延》相比下争一大截。一开场霍建华喺紫禁城跑，网民话以为孔雀喺度跑呀，事关佢件衫又蓝又绿！另外，43岁嘅周迅喺《如》剧中一开头要由17岁少女演起，剧组可能为咗帮佢逆龄，佢每次出场时，条颈都会绑住条又紫又绿嘅巾，有网民形容好似女童军！
此外，周迅把声出名低沉，今次佢亲自配音，但就有正反两极反应。有网友话顶唔住佢把声太低，甚至觉得太沙，但同时又有唔少网友话部剧全靠周迅把声，话佢斋靠把声已经劲有戏味，哗！把声都识演戏？而内地女星谢娜都有支持佢，喺微博留言：“有很多女生从小就不是小细嗓，很特别啊！”
当然周迅个样都一样被批，有啲话唔应该畀太多大头Shot，又怀疑剧组做咗手脚，搞到佢个样好有“玻尿酸feel”，但又有网民话佢以前系剧集收视保证，仲使乜靠样！
论好戏，当然系相隔三十年再度合作嘅陈冲同邬君梅，当年佢哋系电影《末代皇帝》已经交过手，坚系宫廷剧始祖。陈冲今次喺《如》饰演周迅姑妈，邬君梅就饰演太后，一场讲数嘅戏份唔少网友大赞。